भित्ताको परेवा (बालकविता)

— रमेशचन्द्र घिमिरे

 

“नानी हेर कोठामा

काँ’छ परेवा ?”

 

खोजी मर्दा नानीले

फेला पारिनन्

खोजिन्, खोजिन्, खोजिरहिन्

हिम्मत हारिनन्

 

“छैन आमा कोठामा

छैन परेवा !”

 

“अझै हेर भित्तामा

छ कि परेवा ?”

 

भित्तामा’नि हुन्छ र ?

छक्क परिछन्

फोटो हो कि भनेर

शङ्का गरिछन्

 

“छैन आमा भित्तामा

छैन परेवा !”

 

“ हेर भित्ते पात्रोमा

होला परेवा ”

 

मुन्तिर नि छैन त्याँ

छैन मास्तिर

न त अक्षर देखिन्छ

न त तस्बिर

 

“छैन भित्ते पात्रोमा

छैन परेवा !”

 

कुरा बुझाइन् आमाले

कानमा गएर

कुरा बुझिन् नानीले

थाहा पाएर

 

छक्क परी कराइन्

“लौ न अरे वा !

प्रतिपदा तिथि पो

रै’छ परेवा”

— भोर्लेटार, लमजुङ


कुनै सुझाव वा टिप्पणी

Your email address will not be published. Required fields are marked *